ئۇيغۇرتىلى ھەققىدە راي سىناش

     ئەسسالامۇ ئەلەيكۇم ھۆرمەتلىك ئۇيغۇر دوستلار،

     جانلىق بىر مەۋجۇدات سۈپىتىدە تۇغۇلۇپ تەرەققىي قىلىدىغان تىل، ياشاشقا ماس كېلىدىغان شارائىتلاردىن ئايرىلغاندا ياشاش پۇرسىتىدىن مەھرۇم قالىدۇ. يېقىنقى نەچچە ئون يىللىق دۇنيا ۋەزىيىتىگە قارايدىغان بولساق، دۇنيادىكى نۇرغۇن مىللەتلەرنىڭ تىللىرى مەيلى ئۆز يۇرتىدا بولسۇن ياكى كۆچۈپ بارغان يېڭى ماكانلىرىدا بولسۇن ياشاش ئىمكانىيىتىگە ئېرىشەلمەي تارىخ سەھنىسىدىن يوقىلىۋاتىدۇ، بۇ قىسمەت ئاللىقاچان ئۇيغۇرتىلىنىڭ بېشىغىمۇ كەلدى. ئەگەر جىددىي ئالدىنى ئالمىساق، ئالدىمىزدىكى ئون يىل ئىچىدە ئۇيغۇرتىلى چەتئەللەردە ياشاۋاتقان مۇتلەق كۆپ قىسىم ئۇيغۇر ئائىلىلىرىدە ياشاش ئىمكانىيىتىگە ئېرىشەلمەي تامامەن ئۆلۈك بىر تىلغا ئايلىنىشى مۇقەررەر. ئۇيغۇرتىلىنىڭ ھەر بىر ئۇيغۇر ئائىلىسىدىكى تەقدىرى ئەمەلىيەتتە ئۇيغۇرتىلىنىڭ ئورتاق تەقدىرىنى بەلگىلەيدۇ. چۈنكى ئۇيغۇرتىلىنىڭ تۈنجى ۋە ئاخىرقى ماكانى ھەر بىرىمىزنىڭ ئائىلىسىدۇر.

     ۋاقىتسىز ئۆلۈمدىن قۇتۇلۇش ئۈچۈن كېسەلنىڭ ئالدىنى ئېلىشقا، ئۇنى بايقاشقا، كېسەلگە توغرا ھۆكۈم قىلىشقا ۋە ئۈنۈملۈك ئۇسۇلدا داۋالاشقا توغرا كېلىدۇ. دۇنيانىڭ ھەرقايسى جايلىرىدا ياشاۋاتقان ئۇيغۇرلار ئارىسىدا تىلىمىزنىڭ ئىشلىتىلىش ئەھۋالىنى ۋە تىلىمىزنىڭ يوقىلىش خەۋپىنىڭ دەرىجىسىنى بىلىش، بۇ ئىشقا كۆڭۈل بۆلىدىغانلارنىڭ مەسىلىنى ۋاقتىدا توغرا بايقىشىغا ۋە ئۈنۈملۈك چارە – تەدبىرلەرنى ئوتتۇرىغا قويۇشىغا، شۇنداقلا ئائىلە ئىچىدە ئۇيغۇرتىلىنى ئىشلىتىشكە سەل قاراۋاتقان ياكى بۇ توغرىلىق ئويلىنىپ باقمىغان ئاتا – ئانىلارنىڭ ئائىلىدە ئۇيغۇرتىلىنى تېخىمۇ ئىزچىل ئىشلىتىشىگە ۋە بالىلىرىغا ئەستايىدىل ئۆگىتىشگە تۈرتكە بولۇشى مۇمكىن.

     يوللىرىنى ئايرىپ ئۆزلىرى ۋە بالىلىرى ئاللىقاچان باشقا بىر تىل ۋە مەدەنىيەتنىڭ مەنسۇپلىرىغا ئايلىنىپ كەتكەن ياكى كېتىۋاتقانلارنى ئەلۋەتتە ھىچقايسىمىزنىڭ ئۇيغۇر بولۇپ ياشاشقا مەجبۇرلاش ھەققىمىز يوق، ئەمما ئىنسانىي خىسلەتلەرگە باي بىر مىللەتنىڭ ئەۋلادى بولۇش سۈپىتىمىز بىلەن ئەجدادلىرىمىزدىن ئالغان ئامانەتنى ئەۋلادلارغا ھىچ بولمىغاندا ئۆز پېتى تاپشۇرۇپ بېرىشنى كۆپىنچىمىز بىر شان – شەرەپ مەسىلىسى دەپ بىلىمىز ۋە ئۇيغۇرتىلى ھەققىدىكى بۇ راي سىناش سۇئاللىرى دەل مۇشۇنداق قارايدىغان دوستلارنىڭ ئەستايىدىللىق ۋە سەمىمىيلىك بىلەن پىكىرلىرىنى ئورتاقلىشىشى ئۈمىدىدە تەييارلاندى. تولۇقلاشقا تېگىشلىك سوئاللار بولسا ئىنكاس شەكلىدە قالدۇرۇپ قويسىڭىز داۋاملىق قوشۇپ تۇرساق بولىدۇ.

     ئۇيغۇرتىلى ھەققىدىكى راي سىناشقا ھەركىم قاتناشسا بولىدۇ. راي سىناش نەتىجىسىنىڭ توغرا ۋە ئەمەلىيەتكە ئۇيغۇن بولىشى ئۈچۈن، سوئاللارغا ئەستايىدىل ۋە سەمىمىيلىك بىلەن جاۋاپ بېرىشىڭىز تەلەپ قىلىنىدۇ. ھىچقانداق شەخسىي ئۇچۇر تەلەپ قىلىنمايدىغان ۋە كىملىكىڭىز بىلىنمەيدىغان بولغاچقا، ئەمەلىي ئەھۋال قانداق بولسا شۇنداق جاۋاب بەرگەيسىز. راي سىناش نەتىجىسىنى شۇ ۋاقىتنىڭ ئۆزىدىلا بۇ بەتنىڭ ئاستىدا كۆرەلەيسىز. راي سىناش سوئاللىرى ھەققىدە تەكلىپ- پىكىرلىرىڭىزنى ئايىمىغايسىز. قاتناشقانلىقىڭىز ئۈچۈن كۆپ رەھمەت.